مذكرات ليث الخليلي

بسم الله الرحمن الرحيم

اليوم يكون انتهى ثالث ايام عيد الاضحى المبارك ، اعاده الله على المسلمين اجمعين بالخير والبركات .. بس توني ملاحظ انه من كتاباتي كلها ولا مرة كتبت عن العيد مع انه اتوقع حول 6 أعياد مرت خلال كتاباتي وما كنت اكتب عنها شي ..

فأكتشفت شي غريب هو انه انا مو قاعد اكتب الا لما يكون مزاجي رايق جدا وماعندي شي اسويه او متملل او انه مزاجي معتفس وابي افش خلقي بشي بس مو عارف ايش هو .. وشي غريب ثاني اني قاعد اكتب عن الكتابة .. يمكن لان ماعندي موضوع اكتب عنه او انه المواضيع اللي رح اتناولها شخصية وعارف ان كثير ناس بتتابع المدونة .. عموما .. أيا كان ..

العيد هالسنة ولأكن صريح .. ماحسيت فيه ولا استمتعت فيه ولا حتى شعرت انه فيه عيد مر .. الاتصالات كانت قليلة والزيارات قليلة .. وما مر وقت عن آخر عيد وبعد امي مسافرة واخوي مسافر وخالي مسافر وعدد من اصدقائي مسافرين ، يعني ما كانت هالطلعات الحلوة اللي استمتعنا فيها كثير بالعيد وبعدين علشان الوالدة الله يحفظها مسافرة فـ ما كان فيه بهجة العيد ولا شمينا ريحة المعمول ولا حتى قراص العيد اللي من جد بتحسسك انو الدنيا عيد والناس فرحانين وبنسوي اكل العيد زي كل الناس ..

بس الشي الوحيد يمكن اللي كان حلو سويناه ، هو انه ظليت سهران الليلة اللي قبل العيد ورحت مع ابوي الصبح صلينا العيد بمدينة حمد .. - طبعا بمساعدة قوطي رد بول وحبة سنكرز علشان نستمر وما نوقف – .. بعدين رحنا علشان نشتري خروف العيد ونضحيه ، كان خاطري انا اللي اذبحه او اساعد بس المشكلة الوضع ما سمح لان كان فيه وايد ناس ومافيه احد ذبح خروفه بايده .. واصلا المذبحة كانت ما تندش لانه المكان كلش مليان دم وكذا .. بس يعني تنقينا الخروف العربي النعيمي العضلنجي ابو لية وحسسنا على ظهور 20 خروف علشان ناخذ واحد صغير بالسن وكلو لحم .. وطبعا ظلينا ننتظر ساعتين على ما جا دورنا واحنا نطالع بالخرفان اللي قاعدة الناس تنقيها ويصففونهم الى المذبحة .. وطبعا انا وقت الملل ما اقدر اتحمل روحي واطلع التلفون واصور ..

هاذي مجموعة من الصور الحلوة اللي اخذتها .. وبغير من جو المذكرات بصير اضيف عليها صور .. قبل ما كنت احط ولا صورة وكانت مملة وحتى انا لما اقراها امل .. المهم الصور والتعليقات ( قبل ) كل صورة ..

هذا الخروف اللي اخترناه وماشاءالله عليه مع انه شكله كريه بس معضل وكله لحم واللية كبيرة يعني عز  

 وهنا طابور الخرفان اللي تنتظر دورها في النحر وتلاحظون اشكال انواع منها الاسترالي والعربي والايراني

وهاهنا المذبحة اللي يتم فيها عملية النحر .. وكان كل 5 خرفان يدخلو مربطين مع بعض علشان واحد ورا الثاني ..

طبعا بعد ما يعطوك اللحم والراس والسوالف ياخذون الفروة مع انها غالية ولها ثمن بس محد يبيها يمكن لان ما فيه محلات فالبحرين تخيطها ، ماعليه خلوها لكم حلالكم ، الذبح والتقطيع كان مجاني ، نعتبرها اضحية حق اللحام .. شوفو ما شاء الله هذولة بس من يمكن 15 خروف وكان بعدنا فيه قدهم مرتين ..

وصورت كثير صور حلوة ولخرفان متأذية وعيونها حمرا وخرفان استرالية شكلها حلو وخرفان عربية ليتها كبرها مرتين بس ما ابي اخلي المذكرات معرض للصور ، مع العلم اني احب اصور وعندي هواية واعرف اللقطات الحلوة وعندي صور كثير حلوة صورتها بس زي ماقلت ابيها بس علشان يوم اشوفها واقرا الموضوع اتذكر الموقف ..

المهم ، بعد ما رجعنا البيت ، عايدت على بيتا كلهم وبوستهم واتصلت بامي وخواتي واتصلت بجدتي وباهلي في الاردن ولكن تعاجزت اساعد ابوي في تقطيع اللحم وما ارسلت لاي احد مسج تهنئة بالعيد ولا ايميل ولا شي مع انه انا بالعادة وقت التهنئة عندي يكون صباح اول يوم عيد .. ولكن لاني سهران وتعبان .. ماقدرت اتحمل وعلى طول انخمدت على السرير وما قمت الا وقت المغرب .

ماتذكر وين طلعت مع العيلة بس طلعنا وكانت طلعه زينة مو وايد بس زينة .. وثاني يوم اكلنا من الاضحية .. وثالث يوم ماسوينا شي .. يعني العيد ما كان برنامج لان لا اهلي موجودين ولا ربعي موجودين .. فكنت انا وهالانترنت ، وهذي غريبة جدا علي خصوصا بوقت العيد .. مع انه الاجازة اللي قبل العيد ما قعدت ولا يوم ما طلعت فيه .. مع اني يوم اقعد على النت ابدع واطلع افكار كثيرة .. واذا ما ابدع واسوي شي جديد اطالع الناس شتسوي واخذ افكار يعني اخذ خبرة في الناس وافكارهم .. هاليومين شفت شغلات جدا جميلة على النت واعمال رائعه من فيديوهات ومواقع وافلام وثائقية فيها افكار جديدة وحلوة ..

عموما .. طلعت عن الموضوع .. العيد يعني مو نفس باقي الاعياد جدا حلو وبهيج .. بس عموما الحمدلله على كل حال .. كلشي زين .. والحمدلله دوما وابدا ..

اتوقع وايد كتبت ، وانا يوم ابدا الموضوع ما ادري شنو بكتب او شو بحط فيه ، اكتب والافكار بروحها تجي .. ولكن النتيجة طيبة الحمدلله وفرغت شوية عن الكلام اللي يبي يطلع من داخلي .. ودونت لحظاتي التاريخية مع انه كان في بالي اشياء كثير بس وانا انقل بالصور علشان ارفعها على الموقع شت تفكيري وضاع كلشي في بالي .. اذا بتذكر مواقف حلوة لازم ادونها وافكار خاطري احفظها بالتاريخ بكتبها بعدين .. وسلامي ..

هذا الموضوع كتب في 22 ديسمبر 2007 في الساعة 4:21 ص ومصنف بهذه التصنيفات: غير مصنف. يمكنك متابعة التعليقات على هذا الموضوع عن طريق ملف الخلاصات RSS 2.0. يمكنك أن تكتب تعليقاً, أو تعقب على الموضوع من موقعك.