وقفه مع النفس..يا حلوين
خدوا بالكم اليومين الجايين
إحنا ف القرن الواحد وعشرين
فلازم نكون مستعدين
مع بعض جد وصادقين
وإلاّ حياتنا
ح تكون بلون الطين
ليوم الدين
===
لازم عيوبنا ندمّرها
كمان عقولنا نطوّرها
قلوبنا
بالمحبه والسلام نزهّرها
وحقوق الناس ما نهدّرها
بالحريه بلادنا ننوّرها
بآدميتنا نشعر
ولا نرضىَ بحد يزوّرها
وأجيالنا الجايه
بلاش نحيّرها
===
إنت يا بتاع كلّه تمام
إتغيّر
قبل ما تطولك الأقلام
وتدوسك بكره الأقدام
عشان
ما عندكشي غير كلام
وبتكذب
على الناس بأوهام
ما خلاص
كل شىء مكشوف
في دي الأيام
والقرن الحالي مش للأقزام
===
نمهد
لأطفلنا طريق مستقيم
ويكون
سلوكنا لهم تقويم
ما تقولشي لأبنك
خليك رحيم
ولو مؤاخزه..مع الناس
يلاقيك ثعلب لئيم
علّمه
على قد ما يكون بسيط
يكون حكيم
إغرس القيم فيه
وما تسلسله بزمن قديم
كمان
البيئه له نطهّرها
وبكده
كل ضنى ينشأ سليم
===
لازم
كل واحد في بلده
يفهم الدستور
ويفهم
إن له في بلده دور
يعرف حقه
وعلى حق غيره
ما يجور
عايزين
نفوسنا زي البنور
الجهل والتخلف والتطرف
بالعزيمه ندخلهم الجحور
وبالضمير الحي
سلبياتنا ح تسكن القبور
عايزين
أرضنا تعمر ولاش تبور
===
أوعىَ قلبك تدهسه
لمّا الزمن يتوجك بمداس
ما تكونشي
بين الخير والشر محتاس
ما تبانشي
كامل بين الناس
ومع نفسك يحاسبك الأحساس
طوبى لوطن
ما فيه مكان
للوسواس الخناس
عايزين
مكان ف الكون وما ننداس
عايزين
صداره بين بلاد الناس
===
بلاش نهوّن المشوار
قدامنا طريق جبار
مطلوب علم ومعاه إبتكار
واللي متنوّر
ياخد بإيد المحتار
اللي
مش قادر يساير التيار
يحميه
من اللي بينادي
على التخلف بأفكار
ماهو
يا إمّا نسابق الزمن
يا بكره
ح يدهس
نا القطار
