مذكرات ليث الخليلي

 للاسف لم استطع الكتابة عن المعاملة “السيئة” التي واجهتها مع شركة طيران الاردنية الجديدة وذلك لضيق الوقت ولكن بنصح كل المغتربين وغير المغتربين المسافرين انهم لا يعتروا بالاسعار الرخيصة .. لانها اكلة هوا ، ولو تروح مشي احسنلك وبترتاح اكثر

على كل حال ، ما فيه داعي اكتب عنهم واذكر نفسي بالتعب والكآبة .. ولكن بكتب عن موضوع ثاني وهو العودة الى المدارس مع انو ما عندي اشي في بالي بهالوقت لكن يلا بنكتب شو علينا ؟ّ!

 هاي اخر سنة الي ، وعلى نظام التراكمي في البحرين .. ترا مو مهمة كثير لكن الواحد لازم يشد حيلو علشان يرفع معدلوا فوق ال 95 ويتكرم .. انا 95 وبدعو ربي كل يوم ما انقص ولا عشر احسن لا اخسر التكريم .. وان شاء الله بشد حيلي .. على كل حال ، انا هسى بالوقت الحالي ما عندي خاطر ادرس واعيش قرف صحوة الصبح ونكد المدرسين والمشرفين .. ولكن انا متأكد كلها كم يوم والواحد بيتعود وكمان انو اخر سنة بتكون حلوة مع الصحاب وكذا ..

الله يعيننا يارب خصوصا وانا مريض هسى ( التهاب لوز كالعادة ) وبروح لهم اول اسبوع مسطل وبيوخذ المدرسين عني فكرة غلط كمان الهوش على الدفاتر وهرتش المدارس والكاشير بالمكتبات هذا بيستهلك طاقة والواحد لازم يحسبلو الف حساب ..  اف  !

المهم ، مش عارف شو بدي احكي كمان عن هالسولافة والواحد ما بعرف شو بصير معو ، وعسى ان تكرهو شيئا وهو خير لكم وعسى ان تحبو شيئا وهو شر لكم .. لكن بحب اشكر الزوار على تعاونهم وتجاوبهم معي في مذكراتي .. ومع الف سلامة .

اولا السلام عليكم ورحمة الله وبركاته مرة اخرى …

كما هو معروف لدى المغتربين ، قضاء العطلة الصيفية في الدولة الام ، وانا كالعادة بروح على الاردن كل سنة في الصيف وبقعدلي شهرين هناك وبرجع البحرين . وكل مرة بقضي احلى الاوقات في الاجازة ولكن في النهاية بيجي وقت المدارس وبضطر ارجع بعد لا اكون تعودت على طريقة الحياة هناك .. ولكن لحظات الوداع في نهاية العطلة هي اصعب اللحظات اللي ممكن اي بني ادم يتصورها .. الواحد بحب يرجع وبنفس الوقت ما بحب يغادر اهلو واقاربه واصحابه ..

بالنسبة لي انا بحب البحرين كثير وما كنت حاب اجي الاردن لكن لما جيت وتعودت على الحياة وقضيت اوقات حلوة مع الاصحاب والاقارب صارت التجربة فعلا بتستاهل الواحد كل سنة يجي ويغير الجو وبعدين يرجع .. المهم ، انا قاعد بكتب الساعه 4 الصبح والساعه 6 لازم نمشي المطار ونودع الاهل ولسه تره ما ضبيت اغراضي ولا اللابتوب ولا البليستيشن اتوقع ماراح تاخذ وقت ان شاء الله . على كل حال .. الشعور اللي بحس فيه وانا بكتب هالمدونة شعور لا يوصف وما بعرف كلمة تعبر عنه لكن اقدر اقول انه ( مو حلو ) :) على الاقل وبقول في عقلي .. هل يا ترى زعلت حدا بهالشهرين ؟ هل يا ترى سويت كلشي كان نفسي اسويه ؟ كيف لما ارجع على البحرين ؟ يعني مجموعة اسئلة تجعلك تشعر بالضيق .. هذا بالاضافة الى لما تودّع اهلك واصحابك قبل لا تمشي .. وطبعا مو غريب عنكم اذا مسافرين من قبل ..

على كل حال انا ان شاء الله مسافر بعد كم ساعه والوالد والوالدة واختي الله يعطيهم العافية مو مقصرين بالشنت .. ( انت شيل يا ولد بس ) لاني ( حمار شيل و “عتل” ) :) وهم ما بيشيلو شي .. وادعولي بالسلامة ويا اخوان انا بكتب لكم بس ارجع بالرغم انه عدد زوار المدونة شوي لكن انا بحب اكتب عن نفسي مو علشان حدا يقرا ولكن علشان بحب اعبر عن شعوري وافرغ اللي بداخلي وبرضوا اتدرب على الكتابة ..

اخيرا ، اذان الفجر .. دوبني اتحمم والبس واصلي واحط اغراضي ، وانا طالع على طيران الاردنية السيء المعروف والذي للاسف ابتلينا فيه وبكتب بس ارجع ان شاء الله عن الخدمة التعيسة وكل ما سأمر به من مراحل تعيسة مثلهم ومثل خدماتهم ..

والسلام عليكم ورحمة الله وبركاته ..

اهلا وسهلا بكم مجددا في مذكراتي …هاي اول مذكرة بكتبها وبدي ادخل على طول بكتابة المذكرات والاحداث اليومية اللي بتصير معي . وانا شخصيا بنصح الكل يكون عنده مذكرة علشان هالتجربة يمكن تخلي الانسان اكثر انفتاحا وتخليه مرتاح اكثر بالتعبيرعن شعوره .

بالرغم اني قاعد اكتبها على السيرفر الشخصي ومحدا بيعلق عليها لكن هذا على كل حال بخليني اشعر براحة اكثر وانا بكتب وبفرج عن مشاعري … وجميلة انها تكون على الكمبيوتر لاني على كل حال قدرتي على الطباعة وكتابة المقالات رح تزيد باذن الله والاخطاء الاملائية والنحوية وما الى ذلك تقل كمان باذن الله ..

 على كل حال .. ندخل في الموضوع ولو انه الموضوع pg 13 شوي .. المظهر كئيب ومحزن جدا لما شفت هالقطة او القطوة او البسة او الهرة ( تعددت الاسماء والحيوان واحد ) .. تدعسها سيارة وانا اتفرج عليها بكل وضوح ، يعني حتى اللي قلبه قوي ما يقدر يتفرج على هالمنظر وما تتأثر مشاعره ..

كنت ماشي في شارع الجامعة بدور على مكان يعطي دورات كمبيوتر علشان اتعلم ال 3d max بطريقة احسن من ما اتعلمها لحالي بالبيت واريح وما بدها تعب .. وانا بقطع شارع فرعي صغير شفت قطة صغيرة شكلها كثير كيوت قاعدة بتلحس شي من على الشارع . وانا بتفرج عليها ومشيت جنبها على بعد خطوة او خطوتين وبتفرج كمان على سيارة بتنتظرنا نقطع الشارع علشان تمشي ..

قطعنا الشارع الفرعي وواصلنا المشي وانا كملت اتفرج على ورى واتفرج على القطة الجميلة المظهر .. وشفت السايق مشى عادي وبين كأنو متعمد يدعسها ؛ كنت بقوله انو يبعد عن القطة علشان هي شكلها ما بتتحرك .. لكن لساني انربط وما قدرت احكي اشي .. وانا بطلع عليها شفت انو السيارة يمكن بس تقرب من القطة تتحرك وتمشي . لكن القطة ما حست شكلها او الله اعلم .. ومشيت السيارة على ظهرها ولفت فيها العجل .. سبحان الله ، اقشعر بدني وما قدرت اتحرك ووقفت مكاني بالشارع وكل الناس ببتفرج علي انو ليش وقف هالبني ادم فجأة ؟؟

قاعد بتفرج على القطة وهي بتصيح وبتماوي بصوت عالي ويجي يلفها العجل الثاني وزي كأنها تلزق فيه ومشيت مع السيارة وهي مدعوسة بالشارع الرئيسي .. واللي بالسيارة يتفرجوا ومش شايفين اشي .. يالله شو حزنت عليها لما بطلت تتحرك لما لزقت بالعجل الخلفي للسيارة .. صدقوني قربت ابكي ، هالقطة اندعست هيك وانا بتفرج عليها وبقول ما احلاها لو عندنا بالبيت قطة زيها بكون اشي حلو .. وتيجي تدعسها السيارة هيك على ظهرها ويطير اشي معها زي الريش او يمكن هذا شعرها الناعم الحريري وتماوي بصوت عالي .. مشهد صعب ان اوصفه بالكلمات لكن اتوقع اللي شاف شيء يشبه بيعرف ايش بقصد وبيفهمني ان شاء الله ..

مشهد سينمائي روعة محبط في نفس الوقت .. كم تمنيت ان اصور هذه اللحظة .. كما تمنيت اني اصور الكثير من اللحظات في حياتي .. يالله الله كريم .. وخلقنا انا ننسى الاحداث المحزنة الحمدلله .. وانشالله ننسى بالرغم انه شيء صعب .. بتصدقوا يمكن هذا تذكير من عند الله .. لان كل شيء الله خالقه ومدبره لسبب .. يمكن الله خلاني استمر بالتفرج على المشهد علشان اتعظ .. الله اعلم ، لكنني بالفعل اتعظت وان شاء الله يارب يكون الله راضي عني وارجع لنفسي شوي واتدبر في اللي لازم احسنه في نفسي وفي شخصيتي ..

يعني الواحد لو تتخيل نفسك مكانها للحظة ، يعني شو كنت بتساوي ؟؟ شو كنت ممكن تغير في حياتك ؟؟ يعني هذا بالفعل شيء يدعو الواحد للتفكير بنفسه وبحياته وعن شو بدو يساوي .. بدل ما يظل داير بهالشوارع وعلى التلفزيون بدون لا شغله ولا عملة .. صح ، جرب شو فيها .. انته على كل حال رح تطور نفسك للافضل مش للاتعس ..

 قطة بتنط في وسط الشارع بـ ( نصف رأس ) !!

 وعلى فكرة هذا ذكرني بمشهد ثاني وانا رايح مرة على امتحان من امتحانات الوزارة التعيسة في شارع قدام دارنا في البحرين ..

كنت ماشي مع الوالدة الله يحفظها في السيارة على طريق المدرسة المعتاد .. وانا براجع مراجعة اخيرة من الملخصات اللي معي تفرجت قدام السيارة على طول الشارع وبشوف شي ابيض قاعد بينط على ارتفاعات شاهقة يعني يمكن حوالي مترين ويرد يخبط في الارض ومش ينط طبيعي ، مرة يمين ، مرة يسار ، يعني قلت شنو هالقطو المجنون بالبحريني .. لكن لما قربنا بالسيارة شوي شفت ان هالقط بدون راس او تقريبا يعني نص راسه مش موجود والدم في كل مكان … الراس بدون عظم ولا لحم اللهم يمكن الدماغ بس يبين .. وفيه عين مو موجودة .. الظاهر الحادث جديد والقطو بدون راس وقاعد يخابط بدو يموت .. انا بتفرج عليه وقلبي تقطع بصراحة يعني افففففففف .. منظر مقرف .. بتصدقوا لو عندي وقت صورته كمان لكن المشكلة كنا مستعجلين ، اااااه قديش شغلات نتمنى نصورها وتروح عنا .. هو صحيح منظر مقرف لكن زي ما قلت انه يدعو الانسان يتفكر في نفسه ..

على كل حال انا بس حبيت احكيلكم عن هالسولافة حتى لو ما فهمتوا ولو ان العديد من البني ادميين مش رح يتفرجوا عليها ولا رح يتعظوا ولكن على العموم على الاقل علشان افرج عن نفسي وما اكبت مشاعري والشغلات اللي بحب احكي عنها واسوالفها لحدا واشارك فيها اللي حولي والناس كلهم على العموم .. والسلام عليكم ورحمة الله وبركاته .